Zëvendëspresidenti i Shteteve të Bashkuara, JD Vance, pritet të presë në Shtëpinë e Bardhë ministrat e jashtëm të Danimarkës dhe Grenlandës, si dhe sekretarin amerikan të Shtetit, Marco Rubio, në një takim që do të mbahet të mërkurën. Fokusi kryesor i bisedimeve do të jetë e ardhmja e Grenlandës, ishullit më të madh në botë.

Presidenti amerikan Donald Trump ka deklaruar se e dëshiron këtë territor dhe se do ta marrë “me të mirë ose me të keq”. Pas veprimit të tij të fundit ushtarak në Venezuelë, këto deklarata kanë shtuar shqetësimet në Grenlandë.

Trump shkroi të mërkurën në mëngjes në rrjetin Truth Social se “Shtetet e Bashkuara kanë nevojë për Grenlandën për qëllime të sigurisë kombëtare”. Sipas tij, ishulli është jetik për “Kupolën e Artë” që po ndërtohet dhe se NATO duhet t’i prijë SHBA-së në marrjen e këtij territori.

Grenlanda është territor gjysmë-autonom i Danimarkës. Kryeministrja daneze, Mette Frederiksen, ka paralajmëruar se nëse Shtetet e Bashkuara do ta merrnin ishullin me forcë, kjo do të shënonte fundin e aleancës transatlantike të mbrojtjes, mbi të cilën Evropa është mbështetur për dekada.

Një zhvillim i tillë do të përbënte edhe një tjetër goditje serioze për marrëdhëniet mes SHBA-së dhe Evropës, të cilat janë tensionuar ndjeshëm që nga rikthimi i Donald Trump në Shtëpinë e Bardhë. Ndërkohë, udhëheqësit evropianë po përpiqen ta mbajnë administratën Trump të angazhuar, veçanërisht për mbështetjen e një marrëveshjeje të qëndrueshme paqeje për Ukrainën.

Pasojat e mundshme të një konflikti rreth Grenlandës konsiderohen të mëdha, ndërsa mbetet e paqartë se si Uashingtoni synon ta menaxhojë takimin e së mërkurës.

Presidenti Trump këmbëngul se Grenlanda i nevojitet SHBA-së për sigurinë kombëtare, duke paralajmëruar se nëse Uashingtoni nuk e merr ishullin, këtë mund ta bëjnë Kina ose Rusia.

Në këtë kontekst, fuqitë e mëdha evropiane, të cilat kanë shprehur mbështetje të fortë për sovranitetin danez mbi Grenlandën, kanë propozuar rritjen e pranisë ushtarake të NATO-s rreth ishullit dhe në Arktik në përgjithësi.